ILOILO CITY – Padayon ang backtracking sa pagluthang-patay sa anak ni anay Banat Partylist Rep. Salvador “Buddy” Britanico sa Brgy. Nabitasan, La Paz, Iloilo City.
Ini bangud nga tubtub subong, wala pa sa gihapon nakilala ang mga suspek nga nagpatay sa biktima nga si Delfin Britanico, 37.
Sa interview sang Bombo Radyo kay Police Chief Master Sergeant Jerwin Servano, imbestigador sang La Paz Police Station, iya ginpahayag nga sa subong, ginatipon pa nila ang tanan nga kuha sang Closed Circuit Television camera sa lugar nga ginluntaran sang insidente.
Suno kay Servano, antes pa man ang insidente, naghalin pa sa simbahan si Britanico kag nagpatigayon lang sang test drive sa iya motorsiklo.
Ginpahayag ni Servano nga samtang ginatipon ang mga ebidensya, isa man kun tani sa makabulig sa pagsolbar sa krimen amo ang pahayag sang mga witness apang kalabanan sa ila ang nakabati lang sang lupok kag wala nakasaksi sa pagluthang sa biktima.
Lakip sa mga ginasundan nga motibo sa krimen amo ang may kaangtanan sa negosyo kag road rage apang wala man ginadula ang iban pa nga posibilidad.
Sa subong, ginahulat na lang ang resulta sang imbestigasyon sang PNP Crime Labotarory sa nakuha nga recoveries apang mas makapaayo kun tani suno sa natungdan kun nakita ang cellphone sang biktima nga posible makabulig sa pagsolbar sa krimen.
