ILOILO CITY – Tuman ang pagpasalamat sang mga outstanding Ilonggo matapos ginhatagan sang pagkilala sa Handurawan Charter Day Ball 2017 kadungan sang ika-80 nga Charter Day sang Iloilo City.
Isa sa mga nakabaton sang nasambit nga pagkilala si Mr. Herman Basbano, Vice President kag Chief Operating Officer for AM Division sang Bombo Radyo Philippines, para sa Radio Broadcasting and Management.
Ginpahayag ni Bombo Herman nga dungog para sa iya ang kilalahon nga outstanding Ilonggo kag ginpasalamatan ang Bombo Radyo Philippines kag ang chairman nga si Dr. Rogelio Florete, President and CEO Ms. Margaret Ruth C. Florete kag ang pamilya Florete nga ginhatagan siya sang kahigayunan nga makasulod sa media industry.
Ginhalad naman ni Bombo Herman ang nasambit nga pagkilala para sa mga Bombo Martyrs nga naghalad sang kabuhi para maghatag sang balita, impormasyon kag serbisyo sa publiko.
Si Mr. Basbano ang 38 na ka tuig sa broadcast profession sa no. 1 radio network sa Pilipinas, ang Bombo Radyo Philippines, kag sa karon national president sang Kapisanan ng mga Brodkaster ng Pilipinas (KBP) kun sa diin sa sulod sang siyam ka tuig, nangin chairman kag presidente sang KBP.
Ginkilala naman ni Iloilo City Mayor Jed Patrick Mabilog ang kontribusyon sang Bombo Radyo sa siyudad.
Suno sa alkalde, paagi sa patas nga pagbalita kag pagdala sang isyu, nangin instrumento ang Bombo Radyo para makilala ang Iloilo sa bug-os nga kalibutan.