ILOILO CITY – Ginkilala sang Philippine Chamber of Commerce and Industry-Iloilo Chapter Inc. (PCCI-Iloilo) ang mga outstanding Ilonggo entrepreneurs.
Ini ang pinaagi sa Ilonggo Entrepreneur Awards nga ginpatigayon sa National Museum of the Philippines sa Bonifacio Drive, Iloilo City Proper.
Sa interview sang Bombo Radyo kay Mr. Michael Jordan Toledo, Director sang PCCI-Iloilo, iya ginpahayag nga ang Ilonggo Entrepreneur Awards ang isa ka pamaagi sa pagkilala sang mga local entrepreneur nga nagpakita sang pagkamapag-on kag naghatag sang inspirasyon sa tunga sang nagkalain-lain nga mga pagtilaw kag sirkumstansya ilabi na subong nga pandemya.
Ang nasambit nga award ang may tatlo ka mga kategorya nga ginalakipan sang Aspiring Ilonggo Entrepreneur Award, Young Ilonggo Entrepreneur Award kag Ilonggo Entrepreneur Award.
Lakip sa mga ginpasidunggan amo sanday:
-Theodore ‘Ted’ Valderamma Jr., – Young Ilonggo Entrepreneur Award
-Christine Joy Sumpia – Aspiring Ilonggo Entrepreneur Award
-Paulyn Marie Valdez Maseral – Aspiring Ilonggo Entrepreneur Award
-Rina Malones – Aspiring Ilonggo Entrepreneur Award
-Honorato ‘Tatoy’ Espinosa – Ilonggo Entrepreneur Award
Ang mga awardees ang nagbaton sang personalized trophy sa diin inspirasyon sini ang endangered nga Visayan Hornbill ukon ‘Tariktik’ nga gindesinyo sang Ilonggo artist nga si Marrz Capanang.
Nangin dinapit naman nga bisita sa kahiwatan si Iloilo Governor Arthur Defensor Jr.
