ILOILO CITY– Naghatag sang tips ang isa ka outstanding teacher sa kun paano mangin mas epektibo nga manunudlo sa mga kabataan ilabi na sa pagtudlo sang mathematics.
Sa interview sang Bombo Radyo kay Ian Brunia Oranio, teacher II sa Cabatuan Elementary School, iya ginpahayag nga kalabanan sa mga kabataan ang nabudlayan sa patag sang math, apang sa iya bahin ginapangitaan niya sang paagi agud mas mangin interesante ang subject.
Suno kay Oranio, lakip sa iya pagtudlo amo ang paglakip sang games sa pagtudlo sa pila ka mga aktibidad sa math, bangud kalabanan sa mga kabataan sa subong suno sa iya ang mahiligun na maghampang.
Pahayag pa niya, may mga tinion man nga nagahatag siya sa iya mga estudyante sang link sa internet sa diin mahimo ang mga ini makahampang, apang nalakip man diri sa gihapon ang pagtuon sa amo nga subject.
Magluwas diri suno sa natungdan, agud mangin isa ka outstanding teacher, kinahanglan nga may yara ka sang pagpalangga sa imo trabaho, magpasakop sa mga workshops, seminars kag trainings, kag ang hugot nga pagpangamuyo.
