ILOILO CITY – Ginpagamit na sa mga estudyante ang madugay na nga wala magamit nga overpass malapit sa West Visayas State University (WVSU) kag Iloilo National High School (INHS) sa Lapaz, Iloilo City.
Sa interview sang Bombo Radyo kay Jeck Conlu, pinuno sang Public Safety and Transportation Management Office (PSMTO), iya ginpahayag nga bag-o pa man nag-umpisa ang klase, nagpatigayon na sang pagpaninlo sa overpass nga ginahimo na nga tulugan kag ilistaran sang mga nagaliho-liho.
Kadungan sanga pag-umpisa sang klase sa INHS, ginpahayag ni Conlu nga sa overpass na ginapaagi ang mga estudyante agud nga indi na makatuga sang sablag sa mga drivers kag makabuhin sang traffic congestion sa tion sang rush hour.
May yara naman sang magabantay nga traffic auxilliary sa nasambit nga overpass.
Mahimo naman nga pahanugutan nga makatabok sa dalan ang mga senior citizen, Persons With Disability (PWD), nagabusong kag ang may may madamu kag mabug-at nga dala.
