ILOILO CITY – Nagpagwa sang dugang nga impormasyon ang Philippine Embassy officials sa Tel-Aviv may kaangtanan sa isa ka Filipino nga ginapatihan nga isa sa mga gin-kidnap sang Hamas militant groups sa nagapadayon nga Israel-Hamas conflict.
Suno sa mga opisyal sang embahada, padayon pa nila nga gina-verify kun nakuha gid man sang Hamas si Gelienor Pacheco.
Si Pacheco ang isa sa pito ka mga Filipinos nga indi ma-contact.
Suno sa asawa ni Pacheco nga si Clarice, nag-text pa sa iya ang iya bana nga nagasiling nga ginsulod na sila kag nagbilin nga halungan ang ila mga anak.
Pahayag niya, nakita niya sa mga videos sa social media nga isa ang iya bana sa mga gin-abduct sang Hamas.
Nagpangayo man ini sang bulig kay Presidente Ferdinand Marcos.
Suno kay Philippine Ambassador to Israel Pedro “Junie” Laylo, ginahimo na nila ang tanan agud nga makita ang mga missing nga overseas Filipino workers.
Ginpahayag naman ni Consul General kag Deputy Chief of Mission Anthony Mandap nga samtang nga nagadugay nga wala sang komunikasyon sa mga Filipino, nagataas pa ang risgo nga mahimo patay na ang tawo ukon yara sa malain nga kahimtangan.
