Indi pa maathag kun san-o matapos ang total lockdown nga ginpatuman sa Shanghai, China nga amo ang rason kun ngaa suspendido ang overseas voting sa amo nga lugar para sa 2022 Philippine elections.
Suno kay Bombo International Correspondent Donicia Habiling Moloney direkta sa Shanghai, China, nag-umpisa ang coronavirus outbreak bangud sa ginpatigayon nga city-wide testing.
Bangud apektado ang hulag sang mga residente, indi man mapatigayon ang absentee voting nga magaumpisa kuntani sa Abril 10.
Masobra 1,600 ka mga Pinoy ang yara sa amo nga lugar kag nagahulat-hulat pa sa masunod nga abiso sang Commission on Elections (COMELEC).
Sa subong suno kay Moloney, yara sa kapin 17,000 ka bag-o nga asymptomatic COVID-19 cases ang na-rekord kag masobra 300 ka bag-o nga symptomatic infections.
Kun ma-lift na ang lockdown, ipatigayon man ang pagboto suno sa COMELEC.
Indi kaangay sa iban nga mga pungsod kun sa diin pwede makaboto ang mga Pinoy paagi sa mail, personal gid ang overseas absentee voting sa Shanghai kag manual man ang pag-isip sang balota kag indi automated.
