ILOILO CITY- Hugot nga ginpanginwala sang Office of the Vice President ang alegasyon nga plagiarized ang children’s book nga “Isang Kaibigan” nga gin-author mismo ni Vice President Sara Duterte.
Suno kay OVP spokesperson Michael Poa, ang libro may yara sang copyright registration kag narehistro humalin sang December 2023.
Una na gin-alegar sang mga netizens nga may resemblance ang “Isang Kaibigan” sa graphic novel sang American author kag artist nga si Andy Runton nga “Owly Just a Little Blue” kun sa diin pareho nga pispis nga owl ang main character kag nagatudlo sang balor sang pag-abyanay kag pagkamabuot.
Ang libro ni Duterte nahanungod sa istorya sang owl nga nadulaan sang iya abyan nga mga pispis sang naguba ang iya pugad bangud sa bagyo.
Sa tunga sang iya kasubo, isa ka mainabyanon nga parrot ang nagtanyag saang bulig agud magpatukod sang iya pugad.
Ginlunsar ang libro sang Nobyembre 2023 kag gina-distribute sa pila ka public schools sang libre.
Ang libro nag-agaw sang atensyon sang netizens matapos nga ini ang nangin sentro sang mainit nga sabtanay nanday Duterte kag Senator Risa Hontiveros sa ginaalegar sang bise president nga ginapolitika ang proposed P2.037-billion budget para sa 2025 sang iya opisina.
