Ginbuyagyag sang state auditor nga si Roderick Wamil nga nagaserbe testigo sang prosekusyon sa impeachment trial nga napaslawan ang Office of the Vice President (OVP) nga magpasa sang supporting documents sa mga confidential expenses sini sang 2023 nga nagakontra sa Joint Circular nga nagamando sa paggamit sang confidential funds (CF).
Sa pagpamangkot ni Atty. Lorna Kapunan sang prosecution kay Wamil tuhoy sa Audit Observation Memorandum (AOM) nga gin-isyu batok sa Confidential funds expenditures sang OVP sa first kag second quarters sang 2023, ginsiling ni Wamil nga pila sa mga observations sini sa AOM amo ang kapaslawan sang OVP nga magpasa sang mga dokumento bilang pamatuod sang bayad kag pamatuod man sang kadalag-an sang information-gathering kag surveillance activities.
Ang ginatumod ni Wamil amo ang Joint Circular No. 2015-01 sang COA, Department of Budget and Management, Department of the Interior and Local Government, Government Commission for GOCCs, kag Department of National Defense.
Sa idalom sang Item 4.8.5 sang amo nga Joint Circular, ang mga payment para sa rewards ang ginatugutan apang dapat mag-comply sa pila ka mga kondisyon.
Isa ka kondisyon amo nga dapat may approval sang HoA (head of agency) sa bahin sang LGUs (local government units) kag NGAs (national government agencies) kag approval sang Chairman of the Board sa bahin sang GOCCs.
Isa pa ka kondisyon amo nga dapat suportado ini sang mga dokumento nga nagapakita sang madinalag-on nga information gathering.
