Gin-evacuate ang mga personnel sang Office of the Vice President (OVP) kaina sang hapon matapos nakabaton ang isa sa ila sang text message nga ginaalegar nagaunod sang “bomb threat.”
Base sa statement sang OVP, gilayon nga nagpadala ang Mandaluyong City Police Office sang Explosive Ordnance Disposal (EOD) Team agud mag-conduct sang search sa headquarters ni Vice President Sara Duterte sa Robinsons Cybergate Plaza.
Nag-resume man ang operasyon 4:00 sa hapon matapos nakumpirma nga wala sang explosive devices sa lugar.
Sa pahayag sang opisina, nagpanawagan ini sa publiko nga likawan ang pagpadala sang kaangay sini nga threats bisan lahog-lahog lamang.
“Bomb threats are a serious matter concerning public security and safety,” kabahin sang statement. Nagpaandam man ang office nga ginadumilian ang bomb jokes sa idalom sang layi sa Pilipinas. “The public is reminded that hoax bomb threats can endanger lives and are punishable by law under Presidential Decree No. 1727, also known as the Anti-Bomb Joke Law.”
Una na nga ginpahayag sang vice president nga bisan didto siya sa Netherlands agud asikasuhon ang iban nga kinahanglanon sang iya amay nga si former President Rodrigo Duterte, naga-function sa gihapon ang iya nga opisina.
Nahibaluan nga ginsundan ni Sara ang iya amay matapos ini gindala sa The Hague agud atubangon ang charges nga crimes against humanity sa International Criminal Court (ICC). #
