May isa na naman ka staff sa Office of the Vice President (OVP) nga nangluluya kag naglain ang pamatyag samtang ginagisa sa hearing sang Kamara gani nga gindala insigida sa ospital.
Pasado alas sais kagab-i sang ginpaguwa sa Batasang Pambansa si OVP Special Disbursement Officer Gina Acosta samtang nga padayon ang hearing sang House good government and public accountability committee kaangot sa paggamit ni Sara sang confidential funds sang OVP kag Department of Education (DepEd).
Nakit-an nga nakasakay sa wheelchair si Acosta matapos nga nagsaka ang presyon sang dugo sang ginapamangkot ini sang kongresista.
Nagguwa man ang vice president kag gin-alalayan si Acosta agud nga masaylo sa ambulansya para madala sa Veterans Memorial Medical Center (VMMC).
Suno kay Atty. Leandro Resurreccion IV sang OVP Legal Office, unresponsive si Acosta gani nag-deklarar si House Medical Director Luis Bautista sang emergency kag gindalagan ini sa ospital.
Antes naglain ang pamatyag sang opisyal, nakapahayag pa ini sa hearing nga ginhatag niya sang 2022 ang P125 milyon sang OVP confidential funds sa isa ka “Colonel Lachica” nga nagapamuno sa Vice Presidential Security and Protection Group (VPSPG).
Ini apisar nga siya ang opisyal nga disbursing auditor.
Ginpahayag pa sini nga naghalin ang mandu kay Sara nga ihatag kay Col. Lachica ang amo nga pondo.
Ginmuno ni Batangas Representative Gerville Luistro nga siya ang disbursing auditor apang nagdepensa si Acosta nga may sugo si Sara kag nagasalig siya sa colonel bangud ginasaligan man ini sang vice president.
Ginpaathag ni Luistro nga sa idalom sang Presidential Decree 1445, wala dapat ginapasa sang disbursing officer ang iya trabaho sa iban nga tawo.
Gindugang sang opisyal nga pwede mangatubang si Acosta sang kaso nga malversation of public funds bangud sa iya ginhimo.
Todo-depensa naman si Acosta nga nahimo lamang niya ini bangud nagasunod siya sa iya boss kag wala siya sang ihibalo kun paano i-implement ang amo sini nga confidential activities.
Matapos ang interpelasyon, didto na kag naglain ang pamatyag sang opisyal kag gintugutan nga makaguwa sa Batasang Pambansa.#
