Ginkumpirma sang embahada sang Pilipinas nga nakaabot na sa Overseas Workers Welfare Administration (OWWA) ang kaso sang isa ka Ilongga overseas Filipino worker (OFW) nga ginaalegar nga nag-utas sang iya kabuhi sa Abu Dhabi, United Arab Emirates.
Lakip ini sa kaundan sang sabat ni Philippine Ambassador to the UAE Alfonso Ver sa sulat nga ginpadala ni Iloilo City Lone District Representative Julienne “Jamjam” Baronda.
Suno sa embahada, nagahulat ang OWWA nga makaguwa ang death notification halin sa central mortuary para sa Ilongga OFW nga si Mary Jill Dela Cerna Muya, tumandok sang Jaro, Iloilo City.
Ginpahayag man sang embahada nga nagpakig-angot na ang OWWA sa pamilya para sa madasig nga pagpapauli sa bangkay sang biktima.
“We wish to respectfully inform that the case of the late Ms. Muya is currently being handled by the Migrant Workers Office Overseas Workers Welfare Administration (OWWA) in Abu Dhabi,” suno sa sabat sang embahada kay Baronda nga napetsahan sang Enero 2.
“According to OWWA-Abu Dhabi, they are waiting for the issuance of the death notification from the Baniyas Central Mortuary for the late Ms. Muya. OWWA-Abu Dhabi has also reached out to the next-of-kin and is closely coordinating with them for the early repatriation of her remains,” dugang sa sulat.
Nahibaluan nga nagpadala sang sulat si Baronda sa tiglikom sang Department of Migrant Workers (DMW) sang Enero 1 nga nagahingyo nga buligan ang pamilya, kag agud mapatigayon nga ma-imbestigaran ang kamatayon sang Ilongga.
Una na nga nagdangop ang pamilya sa Bombo Radyo kag nagapanawagan sang bulig nga mapapauli ang bangkay sang ila nga himata.
Nagpahayag ang pamilya nga nagapati sila nga may foul play sa likod sang kamatayon sang Ilongga OFW, ilabi na bangud sang nakit-an ini suno sa ila, may higot ang liog sini apang may busal man ini sa baba, nagadapat ang tiil sa salog, kag may lagob sa kamot.
Gintuad man sang pamilya nga TNT ang status sang Ilongga, ukon wala sang regular nga employer kag pasaylo-saylo ini sang trabaho. Nakapanugid man ini anay sa iya anak nga may problema ini sa pinansyal — apang nagpahayag ang anak nga kilala niya ang batasan sang iya iloy, kag wala siya nagapati nga mahimo sini ang pag-utas sang iya nga kabuhi.
