πππ’πππ’ πππ§π¬ βGinpabugal ni Former Iloilo City Police Office Director Police Colonel Joesresty Coronica ang iya nangin performance sa Iloilo City sa sulod sang masobra isa ka tuig nga pagpungko bilang director.
Sa interview sang Bombo Radyo kay Coronica, iya ginpahayag nga nangin madinalag-on sa iya nga liderato ang pagpakigbato sang Iloilo City Police Office (ICPO) batok sa iligal nga droga sa syudad.
Suno kay Coronica, nahatagan nila sang igtalupangod ang problema sa droga sa Iloilo City, kon sa diin, ginplastar sini ang iya nangin mga accomplishment.
Ginpahayag man sini nga sa iya pagpungko bilang director sang talatapan, sugod sang Enero 27, 2023 tubtob Hulyo 12, 2024, nakapatigayon sila sang 561 ka mga buy bust operations sa syudad.
Naglab-ot naman sa 867 ka mga indibidwal ang nagkaladakpan kaangot sa pag-engage sa illegal drugs.
Na-record naman sa iya nga pagpamuno ang P130 million nga balor sang iligal nga druga nga nakumpiska sang Iloilo City Police Office.
Nagpanugyan man ini kay Police Colonel Kim Legada, ang bag-o nga Director nga tutokan ang iligal droga kag indi magpadaso-daso sa mga politiko bangud may kasaysayan nga na-control sang iligal nga droga ang politika.
Nahibaluan nga sa idalum sang pagpamuno ni Coronica, nangin hayag ang ila talatapan sa mga residente nga indi magboto sang mga politiko nga may kaangtanan sa iligal nga droga.
