ILOILO CITY – Ginpaboran ni Sen. Grace Poe ang desisyon sang Ombudsman nga pasakaan sang kaso si anay Presidente Benigno “Noynoy” Aquino III, may kaangtanan sa kamatayon sang 44 ka miyembro sang Special Action Force (SAF) sa operasyon sa Mamasapano, Maguindanao.
Sa interview sang Bombo Radyo Iloilo kadungan sang pagtambong ni Poe sa convention sang Filipino-Chinese Chamber of Commerce Panay Chapter, ginpahayag sini nga kahigayunan na ini para sa anay presidente agud magpaathag sang iya bahin.
Wala sang kahadlukan si Aquino suno sa senador, kun wala ini sang may nahimo nga sala.
Isa man ini ka paagi suno kay Sen. Poe para matapos na ang isyu sa kamatayon sang SAF 44.
Nahibaluan nga ang Senate Committee on Public Order nga ginapamunuan sadto ni Poe, ang isa sa mga nagpatigayon sang imbestigasyon sa Mamasapano incident.
Sa resulta sang Senate probe, may salabton ang sadto Presidente Noynoy Aquino, sa kamatayon sang mga miyembro sang SAF, bilang commander-in-chief.