Nagdangat sa P1.2-million ang balor sang ginapasuni shabu nga nakumpiskar kadungan sang drug buy bust operation nga ginkasa sang Regional Police Drug Enforcement Unit (RPDEU) 6 sa Barangay Ungka 1, Pavia, Iloilo.
Ang mga naaresto amo sanday alias Anthony, 43, residente sang Mandurriao; Alias Eldon, 28, residente sang Pavia; alias Cliff, 38, residente sang Jereos, La Paz; kag alias Robert, 23, residente sang Pilar, Capiz.
Sa interview sang Bombo Radyo kay Police Captain Glen Soliman, officer in charge sang RPDEU, iya ginpahayag nga isa ka sachet sang suspected shabu ang nabakal sa main target kabaylo sang buybust money nga P12,000.
Na-recover dugang sa ila possession ang 17 sachets sang shabu nga nagabug-at sang 180 gramos, samtang nakumpiskar naman kay alias Cliff ang .22 caliber revolver nga may apat ka mga bala.
Antes ang operasyon suno kay Soliman, nadakpan man ang tatlo sa nagkalain-lain nga drug buy bust lakip si Anthony nga nakaguwa paagi sa plea bargaining agreement, si Eldon nga acquitted, kag si Cliff nga convicted man apang nag-appeal.
Sa ila apat, si Robert lamang ang ginakabig nga street level individual samtang lunsay naman high-value individuals ang tatlo.
Nagapabilin ang mga subject sa Pavia Municipal Police Station kag magapangatubang sang kaso nga paglapas sa RA 9165 ukon Comprehensive Dangerous Drugs Act of 2002, kag may mangatubang man sang separado nga kaso bangud sa paghupot sang iligal nga armas.
