ILOILO CITY – Nagdangat sa masobra sa isa ka milyon ka pesos ang balor sang iligal nga droga ang nakuha sa isa market vendor sa ginpatigayon nga drug buy-bust operation sang Regional Police Drug Enforcement Unit (RPDEU)-VI kag Molo Police Station sa ICAG road, Brgy Taal , Molo, Iloilo City.
Ang arestado amo si Res Leonardo, 46, isa ka market vendor kag residente sang Zone 2, Brgy. Tanza, Ezperanza Iloilo City.
Nabaklan si Leonardo sang isa ka sachet sang suspected shabu kag nakuha dugang sa iya ang 26 ka sachet sang ginapatihan nga iligal nga droga.
Sa interview sang Bombo Radyo kay Pol. Lt. Col. Mark Anthony Darroca, pinuno sang RPDEU VI, iya ginpahayag nga naglab-ot sa ginabanta 200 grams sang ginapatihan nga droga ang nakuha kay Leonardo nga may standard drug price nga Php 1,360,000.00.
Suno kay Darroca, isa ka bodegero si Leonardo kag may connection kay Mark Baylon nga isa ka inmate sa National Bilibid Prison (NBP).
Si Leonardo ang napreso sa kaso nga homicide kag natapos ang sentensya sa NBP kag sang 2018, nalakip ini sa listahan sang mga gintokhang sa ila nga lugar.
Ginpanginwala naman sang subject nga nagagamit siya sang iligal nga droga apang bilang proseso, ipaidlaom ini sa drug test.
Sa subong, yara na sa Molo Police Station si Leonardo kag magapangatubang sang kaso nga paglapas sang RA 9165 ukon paglapas sang Comprehensive Dangerous Drugs Act of 2022.
