Nagdangat sa P1.7-million ang balor sang ginapasuni shabu nga nakuha sa subject sa drug buy bust operation sa Barangay Carvasana, Calinog, Iloilo.
Ang arestado amo si alias Pani, 45, residente sang Barangay Tabucan sa amo man nga banwa.
Sa interview sang Bombo Radyo kay Police Major Myles Dieron, hepe sang Calinog Municipal Police Station, iya ginpahayag nga
magluwas sa walo ka sachets sang suspected shabu nga nagabug-at sang 260 gramos nga nakuha sa subject, nakumpiskar man ang isa ka .45 caliber pistol nga may mga bala.
Suno kay Dieron, sang nagligad nga tuig pa ginsuguran ang monitoring sa subject apang nabudlayan ang otoridad nga madakpan ini bangud nga naga-transact ang suspek sa suod lang sini nga mga kakilala.
Ginapahayag nga wholesale ang transaksyon sang suspek kag wala ini nagabaligya sa Calinog kundi sa iban nga mga banwa.
Wala nag-ako ang suspek kun sa diin nagahalin ang iligal nga droga, apang sandig sa pagpangusisa sang pulis, sa presuhan ginakuha ang shabu kag si alias Pani ang nagabaligya sa guwa.
Sa record sang pulis, nagaguwa nga nagagamit man sang iligal nga droga ang subject.
Natalana ini nga mag-atubang sang kaso nga paglapas sa Republic Act 9165 ukon sa Comprehensive Dangerous Drugs Act of 2002 kag RA 10591 ukon sa Comprehensive Law in Firearms and Ammunitions.
