ILOILO CITY- Nataban sang tatlo ka suspetsado ang masobra P1.7 million nga balor sang kwarta sa natabo nga hold-up sa Rizal Street, Brgy. Poblacion, Pototan, Iloilo.
Sa interview sang Bombo Radyo kay PMSgt Mark Parreño sang Pototan Municipal Police Station, iya ginpahayag nga padulong kuntani sa bangko agud magdeposito sang ila koleksyon ang duha ka empleyado sang J&T Express-Pototan Branch sang sila ang ginbalabagan sang mga suspek nga nagasakay sa motorsiklo.
Suno kay Parreño, gintayaan sang armas sang isa ka suspek ang mga biktima kag ginkuha ang bag nga nagaunod sang kwarta.
Pahayag sang pulis, matapos nakuha ang kwarta, madasig nga nagpalagyo ang mga suspetsado sa direksyon nga padulong sa Barotac Nuevo.
Ginapahayag nga nakasuksok sang bonnet ang mga suspek.
