ILOILO CITY- Nagdangat sa ginabanta P1.7 million ang balor sang nagkalaupos nga propedad sa sunog nga nagluntad sa Brgy. Bakhaw, Mandurriao, Iloilo City.
Sa interview sang Bombo Radyo kay Fire Chief Inspector Melanie Habawel, City Fire Marshall sang Iloilo City Fire Station, iya ginpahayag nga nag-umpisa ang kalayo sa abandonado nga balay ni Alofe Prevendido.
Suno kay Habawel,human sa light materials ang mga kaiping nga balay ni Prevendido rason nga madasig nga nagmakot ang kalayo.
Lakip sa mga balay nga totally burned amo ang mga balay nanday:
.Alofe Prevendido
.Maria Christina Blance
. Noel Alagaran
. Wilson Pondevida
. Romydet Cabarles
. Angel Sinfuego
. Mary Jean Sultan
.Angelo Vasquez
. Trixia May Vazquez
. Gloria Vasquez
. Cynthia Diaz
.Rosa Rubinas
.Angela Fernandez
.Marilou Buensuceso
.Crizzyl Jimena
Partially burned naman ang puluy-an nanday:
.Vilma Jimena
.Charles Vasquez
.Jimmy Andrada
.Glory Rafer
Sa subong, padayon pa nga gina-imbestigaran ang gintunaan sang sunog.
Apisar, nadulaan sang puluy-an, nagapasalamat naman ang iloy nga si Romydet Cabarles nga nakaluwas gikan sa sunog sila sang iya anom ka bulan nga bata kag amay nga nagasuprir sang stroke .
Suno sa iya, mahamuok ang ila katulugon sang nag-ibwal ang sunog kag sa maayo nga palad, nakabugtaw ang mga ini kag nakahalin gilayon sa sulod sang ila balay.
Gilayon naman nga naghatag sang bulig ang Iloilo City Government sa mga biktima nga temporaryo nga nagatinir sa gym sang barangay nga nagaserbi nga evacuation center.
Suno kay Juna Alidron, Social Welfare Officer 3 sang City Social Welfare and Development Office, nahatagan na ang mga biktima sang ila nagapanguna nga mga kinahanglanon kaangay sang pagkaon, bayo, hiligdaan kag iban pa nga relief goods.
