Ginsita sang mga mamalidha ang P1 billion nga pondo sa proposed budget sang Department of Health para sa 2026.
Suno kay House Deputy Speaker Janette Garin, sa baylo nga ipain kuntani ang amo ka dako nga pondo para sa mga pampubliko nga ospital kag rural health units (RHUS), nagpain pa ang DOH sang amo ka dako nga budget para gastuhon sa pagpanami sang mga opisina sang ahensya.
Ginkwestyon sang kongresista kun paano ini nakalusot sa Department of Budget and Management (DBM).
Suno kay Garin nga tiglikom na sadto sang DOH, ang amo nga alokasyon nga nasiplatan sa hearing sang House committee on appropriations, wala nagasanto sa prayoridad ni Presidente Ferdinand Marcos Jr., nga nagaduso sang “zero balance billing” sa mga ospital para sa mga pigado nga pasyente.
Bangud sini, ginpahayag ni Garin nga kinahanglan nga mas mangin mapisan ang mga mamalidha nga busision ang proposed budget para makakas ang mga indi man kinahanglan nga alokasyon.
