Ginpanginwala sang kampo ni Vice President Leni Robredo nga may mga caravan kits nga ginpanagtag sang ginpatigayon ang nationwide motorcade sang nagligad nga weekend para sa iya kag kay Senator Kiko Pangilinan.
Ang nagalapta nga pictures sang caravan kit ang nagaunod sang P100, snack bar, campaign sticker, pink nga face mask, kag sulat nga naga-engganyo nga magboto kay Robredo.
Suno kay Atty. Barry Gutierrez, spokesman ni Robredo, fake news ini kag isa lang ka sahi sang pagpang-guba.
Ginsuportahan man ini ni former Ifugao Rep. kag senatorial aspirant Teddy Baguilat Jr. nga nagsiling nga wala nagapamakal sang boto ang Team Robredo-Pangilinan.
