Naglab-ot na sa kapin P102 million ang balor sang kahalitan nga natuga sang el niño sa ‘livestock kag poultry industry’ sa pila ka banwa sa probinsiya sang Iloilo.
Suno kay Dr. Darel Tabuada, Veterinarian IV sang Provincial Veterinarian Office (PVO),sa 42 ka kabanwahanan sa probinsya, siyam diri ang nag-report sang kahalitan sa livestock kag poultry.
Ini ginalakipan sang Lambunao, Bingawan, Santa Barbara, Dueñas, Igbaras, Miag-ao, San Dionisio, Janiuay, kag Cabatuan.
Ginpahayag ni Tabuada, kalabanan sa nahalitan ang mga manok nga nagapangitlog bangud nagakadula ang ila gana sa pagkaon kag pag-inom bangud sa tuman nga kainit.
Santo sa data sang PVO, 2, 538 ka mga manok ang nahalitan sa Bingawan; 654 sa Lambunao; kag 214 sa Igbaras.
May nagkalamatay man nga mga karabaw,baka kag kanding bangud sa kakulang sang pagkaon ukon hararbon.
Ginalauman naman nga madugangan pa ang mga banwa nga magapasa sang damage reports apang ginaantisipar nga mangin gamay lang ang kahalitan sa iban nga banwa.
