Dako ang posibilidad nga magdangat sa P11 trillion ang kapyerdehan sang sektor sang edukasyon sa sulod sang 40 ka-tuig bangud sa long-term impact sang COVID-19 pandemic sa face-to-face classes, pagsirado sang mga buluthuan kag pagkadula sang trabaho sang mga manunudlo.
Santo sa data sang National Economic and Development Authority (NEDA), ang losses para sa school year 2020 to 2021 ang ginabanta yara sa P230 billion kag posible nga magasaka pa ini sa P10.8 trillion sa masunod nga 10 tubtob 40 ka-tuig.
Suno sa ahensya, ang computation ang ginbase sa isa ka-tuig nga pagsirado sang mga buluthuan, module-based learning kag ang impact sini sa masunod nga 40 ka-tuig sa average working life sang isa ka indibidwal.
Gin-athag man sang NEDA nga humalin sang nag-umpisa ang pandemya partikular sang Marso 2020, kapin 865 ka pribado nga mga eskwelahan ang nagsirado kasunod sang mga ginpatuman nga total lockdowns.
Ini ang wala lang nag-apekto sa sektor sang edukasyon kundi mangin sa bug-os nga ekonomiya sang pungsod.
