ILOILO CITY- Naglab-ot na sa P111,105, 570 ang naangkon nga kapierdehan sang sektor sang agrikultura sa Rehiyon 6 kasunod sang paglaslas sang Bagyo Agaton.
Sa interview sang Bombo Radyo kay James Earl Ogatis, iya ginpahayag nga ang commodity nga pinakanahalitan amo ang humay nga nagabalor sang P110,231,000; ginasundan sang mais nga yara sa P618,000; poultry kag livestock nga yara sa P256,000.
Sa probinsya sang Iloilo, masobra sa P24,000,000 ang balor sang production loss sa humay; P618,000 sa mais; kag P255,000 sa livestock kag poultry.
Sa Capiz, yara sa P81,800,000 ang production loss sa humay samtang sa Antique, yara sa P4,120,000 ang production loss sa humay.
Naglab-ot naman sa 3,971 ang numero sang mga apektado nga farmers kag fisherfolks sa bilog nga rehiyon kag sa sini nga numero,826 diri ang halin sa Iloilo; 2,990 ang sa Capiz; kag 155 sa Antique.
Suno kay Ogatis, ini nga damage report ang posible pa madugangan sa masunod nga mga inadlaw bangud nagapadayon pa ang consolidation sang data sang ahensya.
