Passi City – Ginpang-guba kag ginsunog sang Philippine Drug Enforcement Agency Region 6 ang P14.5 million nga balor sang iligal nga droga nga narekober sa ila mga operasyon humalin sang tuig 2017 tubtob 2023.
Ini matapos ang ginpatigayon nga Destruction of Dangerous Drugs sang ahensya sa Central Azucarera de San Antonio sa Barangay Cadilang, Passi City.
Sa interview sang Bombo Radyo kay Melvin Estoque, Acting Regional Director sang Philippine Drug Enforcement Agency Region 6, iya ginpahayag nga nalakip sa mga ginsunog nga droga amo ang 2.128 kg sang shabu kag 5.2 g sang marijuana.
Suno kay Estoque, nga apisar may kakulangan sa mga resources sang ahensya, mapisan ang mga ini sa pagpapas sang iligal nga droga sa Western Visayas bangud man sa suporta sang mga local government units.
Ginsiguro man niya nga wala sang drug recycling nga natabo bangud well monitored kag secured ang mga gintago nga droga sa evidence room.
Samtang, nagtambong naman sa nasambit nga aktibidad ang Police Regional Office 6, Passi City Local Government Unit, kag Branches 68, 71, 65 kag 25 sang Regional Trial Court.
