ILOILO CITY- Nagahingyo sa Regional Tripartite Wages and Productivity Board Region 6 sang P150 nga wage recovery ang mga mamumugon sa Western Visayas.
Sa interview sang Bombo Radyo kay Mario Andon, spokesperson sang United Labor, iya ginpahayag nga bangud sa inflation, nagnubo ang balor sang sweldo sang ordinaryo nga mamumugon.
Suno kay Andon, kinahanglan nga madugangan ang sweldo agud mapahagan-hagan man ang kabudlay nga ginapangatubang sang nasambit nga sektor.
Nahibaluan nga magapatigayon sang public hearings sa Oktubre 10 kag 21 ang Regional Tripartite Wages and Productivity Board agud istoryahan ang potensyal nga minimum wage adjustments para sa mamumugon sa pribado nga sektor kag domestic workers ukon mga kasambahay.
Ang una nga konsultasyon ang patigayunon sa diri sa Mandurriao nga magasakop sa Iloilo City kag probinsiya sang Iloilo, Aklan, Capiz, Antique, kag Guimaras.
Ang ikaduha nga konsultasyon patigayunon naman sa Bacolod City nga maga-cover sang Bacolod City kag Negros Occidental.
