Ginahingyo sang mga kritiko sa Commission on Audit (COA) nga busision ang masobra P2 billion nga confidential funds nga gingamit ni Vice President Sara Duterte sang tion nga siya pa ang alkalde sang Davao City.
Sa data sang COA, ang Davao City ang may yara sang P2.697 billion nga confidential funds halin sang 2016 tubtub sang 2022 — balor nga mas mataas pa ipaanggid sa iban nga mas daku kag mas manggaranon nga local government units kaangay sang Cebu City, Quezon City, Manila kag Makati City.
Suno kay House Deputy Minority Leader kag ACT Teachers Party-list Rep. France Castro, buot silingon sini, naggasto ang Davao City sang P1.235 million kada adlaw sang nagligad nga anum ka tuig halin sa amo nga pondo.
“We cannot tolerate any misuse or abuse of public funds, especially large amounts allocated for confidential purposes. We must hold our public officials accountable and ensure that transparency and integrity prevail in our governance,” suno sa mamalidha.
Sa idalom sang Joint Circular No. 2015-01 sang COA kag sang Department of Budget Management, ang total amount sang confidential funds sang local government unit ang indi dapat maglapaw sa 30% sang total annual amount nga ginpain para sa ila nga Peace and Order and Public funds.
Para naman kay Bayan Muna Chairperson Neri Colmenares, daw indi ma-imagine kun paano maggasto sang local public official ang P2.6 billion sa anum ka tuig.
Wala pa sang sabat ang kampo ni Duterte sa amo nga partikular nga isyu nga amo ang nagsunod sa iya kontrobersyal man nga confidential kag intelligence funds sa idalom sang Office of the Vice President kag Department of Education.
Lain naman panan-awan ni Senator Ronald “Bato” dela Rosa, isa anay ka PNP Chief kag suod nga kaalyado sang vice president kag sang iya amay nga si former President Rodrigo Duterte.
Ginhangkat ni dela Rosa ang mga kritiko sang bise-presidente nga pamatud-an nga ginbulsa niya ang pondo.
Suno sa senador, ini nga mga isyu ang pat-od nga ginapalutaw lang sang mga kasumpong ni Duterte bangud sa ginapanan-aw nga posible pagpadalagan sini sa pagka-presidente sa 2028. #
