Masobra 3,000 ka mga indibidwal kag establisimento ang narekord sang Compliance Team nga nagalapas sa health protocols humalin sang Hunyo tubtob Agosto 2021 sa syudad sang Iloilo.
Lakip sa mga violators ang gin-isyuhan sang citation ticket nga may multa nga P1,000 kag ginpa-render sang community service.
Sa interview sang Bombo Radyo kay Mr. Nestor Canong, pinuno sang Compliance team, iya ginpahayag nga sa sulod sang tatlo ka bulan, naglab-ot sa masobra P235,000 ang natipon sang City Treasurer’s Office gikan sa mga violators.
Sang Hunyo, 1420 violators nga nadakpan sa diin P65,500 ang nakolekta nga kwarta kag 37 ang nag-render sang community service.
Sang Hulyo, 733 violators ang nadakpan sa diin P72,500 ang nakolekta nga kwarta kag 19 naman ang nag-render sang community service.
Samtang sang Agosto, 1231 ang gin-isyuhan sang citation ticket, P97,000 ang nakolekta nga kwarta kag 10 ang nag-render sang community service.
Suno kay Canong, may yara pa sang masobra 50 ka mga indibidwal nga wala nakabayad sang multa kag wala man naka-render sang community service apang ang ila mga pangalan ang ginpasa na sa City Legal Office agud nga mapadal-an sang “summon.”
Dugang pa sang natungdan, madamo sa gihapon sang mga pasaway nga nagalapas sa minimum health protocols ilabi na ang mga wala naga face mask kag indi husto nga pagsuksok sang face mask.
Ang kwarta nga natipon halin sa mga violators ang ginadugang sa pondo sang syudad kag ginagamit sa mga kinahanglanon sang medical frontliners.
