ILOILO CITY – Gintambungan ni Department of Public Works and Highways Undersecretary Roberto Bernardo ang pagbukas sang Buhang Flyover kahapon, Mayo 15.
Ang Buhang Flyover ang nagalaba sang 340 linear meters kag nagalapad sang 10.34 meters.
Tinutuyo sang pagbukas sang nasambit nga flyover nga mapahagan-hagan ang pagpugok sang trapiko ilabi na sa intersection sa tion sang masako nga inoras.
Sa interview sang Bombo Radyo kay Engr. Edward Sudario, chief sang construction department sang Iloilo City District Engineering Office, iya ginpahayag nga magapatuman ang opisina sang pila ka mga pagsulundan sang mga salakyan nga ginadumilian nga makaagi sa flyover kaangay sang articulated trucks, masobra sa three-axle nga salakyan, 10-wheeler trucks, wing vans, bisekleta, traysikol, kag motorsiklo.
Suno kay Sudario, agud masigurado nga ginatuman ang mga pagsulundan, magapahamtang ang mga ini sang signage kag traffic auxiliaries sa punta nga bahin sang flyover.
