ILOILO CITY- Gin-aprubahan na sang National Wages and Productivity Commission (NWPC) ang bag-o nga minimum wage sa Western Visayas.
Sa bag-o nga minimum wage,ang mga empleyado sa private establishments nga may 10 ukon masobra pa nga mga tinawo ang magabaton sang Php450 daily wage gikan sa current Php395 wage per day, samtang ang mga industriya nga may empleyado nga 10 ka bilog ukon mas manubo,mangin Php 420 na ang minimum daily wage gikan sa current nga Php 310 per day.
Sa interview sang Bombo Radyo kay Department of Labor and Employment Region 6 director Atty. Sixto Rodriguez, iya ginpahayag nga magasapol pa ang tanan nga katapo sang Regional Tripartite Wage and Productivity Board (RTWPB)-6 agud istoryahan kun san-o ini i-publish sa pamantalaan.
Suno kay Rodriguez, sa tion nga ma-publish ini sa Mayo 20, ipatuman na ang minimum wage increase sa Hunyo 4.
Nahibaluan nga base sa layi, kinahanglan anay ini nga ma-publish sa sulod sang 15 ka adlaw antes ipatuman.
Gin-athag naman ni Rodriguez nga mahimo maka-file sang exemption ang mga negosyante nga indi makasarang sa amo nga wage increase.
