ILOILO CITY – Ginkwestyon ni Iloilo City Mayor Jerry Treñas ang balor P5.9 million nga gasto sang Espinosa administration sa pagkaon sa ginpatigayon nga PAG-ULIKID program.
Santo sa mga dokumento, ang nasambit nga kantidad ang gingasto sa pagbayad sa isa ka catering service sulod sang 15 kag 12 ka adlaw nga pagserbisyo kag pagsupply sang pagkaon sa magkatuhay nga mga aktibidad.
Sa interview sang Bombo Radyo kay Iloilo City Mayor Jerry Treñas, iya ginlawag isa-isa ang mga pagkaon nga ginbakal sang Espinosa administration.
Ginpahayag ni Treñas nga iya pa nga ginapasuma sang amat-amat ang iban pa nga mga gingasto sa nasambit nga programa ni anay Iloilo City Mayor Jose Espinoa III.
Ang P5.9 million suno sa alkalde ang gingasto sang amat-amat sa diin ang tagsa ka purchase order ang yara sa masobra sa P170,000 tubtub P900,000.
Ginpahayag sang alkalde nga tuman ka garboso ang ginhimu sang Espinosa administration kag sa baylo, gingasto na lang kun tani ang kantidad para sa feeding program sa mga kabataan, pagbulig sa mga dialysis patients, pagpasanyog sang environmental, health kag educational programs.
Magluwas sa overprice nga pagkaon, ginkwestyon man sang natungdan ang iban pa nga purchase order sang Iloilo City Government kasubong sang pagbakal sang mga salakyan kag motorsiklo para sa tagsa ka department sa Iloilo City Hall.
Suno kay Treñas, kun wala pa nabayaran ang mga nasambit nga purchase order, iya ini nga ipakansela.
Sa subong, wala pa sang sabat si Espinosa tuhoy sa nasambit nga isyu bangud nga yara pa siya sa luwas sang pungsod.
