Naglab-ot sa P5-million ang balor sang ginapasuni shabu nga nakumpiskar sa drug buy bust operation nga ginpatigayon sang Provincial Drug Enforcement Unit (PDEU) sa Barangay Tinocuan, Dingle, Iloilo subong nga adlaw, Agusto 23.
Ang main subject sa operasyon amo si alias Bonbon, 39 anyos, isa ka High-Value Individual (HVI), residente sang amo nga barangay.
Dakop man si Alyas Bentot, 55; duha ka mga lookout nga naga-edad 30-anyos kag 31-anyos; kag isa ka lalaki nga taga-Bulacan nga hinablos sang main subject.
Nagabug-at sang 740 gramos ang suspected shabu kag may balor nga P5,032,000.
Sa inisyal nga impormasyon halin sa PDEU, nagikan ang suplay sang droga sa syudad sang Iloilo kag Antique.
Magluwas sa illegal drugs, na-recover man ang isa ka 12 gauge shot gun, isa ka AR 15-9mm rifle, isa ka airsoft rifle, kag isa ka granada.
Sa pagpangusisa sang Bombo Radyo, may nauna na nga kaso si alias Bonbon kag alias Bentot.
Yara na ang paghinakop sang mga pulis ang arestado, ipaidalom sa tests, kag natalana nga magpangatubang sang nagakaigo nga mga kaso.#
