Nagmadinalag-on ang ginpatigayon nga operasyon sang mga katapo sang Bureau of Internal Revenue (BIR) upod ang Regional District Officer sa isa ka warehouse sa syudad sang Iloilo, kun sa diin na-recover ang madamo nga peke kag wala nag-agi sa proseso nga sigarilyo.
Sa interview sang Bombo Radyo kay Atty. Nico Benidect Lim, Officer-in-Charge Assistant sang BIR, ginpahayag sini nga ang mga sigarilyo nga nakuha sa nasambit nga bodega wala sang tax stamp halin sa BIR kag indi legal nga ginabaligya.
Suno pa kay Atty. Lim, wala man sang official nga tatak kag warning label ang mga pakete sang sigarilyo, isa sa mga importante nga requirement sang layi sa mga produkto nga ginabaligya sa publiko.
Gani, makabig ini nga illicit cigarettes bangud nga wala ini nag-agi sa legal nga proseso kag wala man nakabayad sang excise tax nga ginapahamtang sang gobyerno.
Ginkumpirma man sang abogado nga madugay na nga gina-monitor sang kapulisan ang amo nga warehouse tubtob nga ginpalab-ot ini sa atensyon sang BIR.
Kapin sa P5 million ang balor sang nakumpiskar nga mga smuggled nga sigarilyo.
(BIR)
Sa subong, padayon pa ang imbestigasyon sang BIR agud matukiban kun sa diin halin ang mga sigarilyo kag kun sin-o ang responsable sa pagpamuno sang mga iligal nga produkto.
