Magasapol ang Department of Energy (DOE) sa mga kumpaniya sang langis kag stakeholders sa masunod nga semana agud nga ma-diskusyunan ang inventories kag ang discount programs para sa mga motorista.
Suno kay DOE Oil Industry Management Bureau Director Rino Abad, luyag sang ahensya nga indi mag-untat ang discount kundi dugangan pa para sa ikaayo sang mga consumer.
Gin-imbitahan man ang Land Transportation Franchising and Regulatory Board (LTFRB) kag ang Department of Agriculture (DA) nga mag-intra sa diskusyon kag maghatag sang updates sa status sang fuel subsidy distribution.
Sa idalom sang 2025 national budget, P2.5 billion ang ginpain para sa fuel subsidy program para sa public transport kag P485 million para naman sa mga mangunguma.
Base sa abiso sang ahensya, yari ang posible nga adjustment sa masunod nga semana sandig sa 4 days of trading sa Mean of Platts Singapore:
Gasoline – P2.50-P3 per liter
Diesel – P4.30-P4.80 per liter
Kerosene – P4.25-P4.40 per liter
Pahayag pa sang DOE, mahimo pa gani maglab-ot sa singko pesos ang isaka sa diesel.
Katapusan nga naka-eksperyensya ang Pilipinas sang singko pesos nga saka sa diesel prices sang Marso 2022 matapos nga gin-ban ni anay US President Joe Biden ang pag-import sang Russian oil, liquefied natural gas, kag coal sa United States.
