Gin-anunsyo ni Department of the Interior and Local Government (DILG) Secretary Jonvic Remulla ang ₱50-million nga patong sa ulo ni Sen. Ronald “Bato” Dela Rosa.
Gin-anunsyo ini sa press conference subong nga hapon, Oktubre 23.
“As of today, Sen. Bato will be considered armed and dangerous. We are placing a P15-million bounty for his capture,” suno kay Remulla.
Naghatag man ang Philippine National Police (PNP) sa pugante nga senador sang isa ka semana agud nga magsungka sa awtoridad.
Matandaan nga may arrest warrant nga gin-isyu ang International Criminal Court ukon ICC batok kay Dela Rosa bilang indirect co-perpetrator sa crimes against humanity nga may kaangtanan sa mga pagpamatay kadungan sang kampanya kontra droga sang administrasyon ni anay Presidente Rodrigo Duterte.
Una na nga ginpahayag ni Remulla nga yara si Dela Rosa sa Mindanao kag ginaprotektahan sang isa ka grupo.
Suno sa tiglikom, nagapadayon ang negosasyon sang mga awtoridad sa grupo nga nagahatag sang proteksyon sa senador agud nga ma-turn-over ini sa mga otoridad kag malikawan ang posible nga madugo nga komprontasyon.
Dugang ni Remulla, indi basta-basta makasulod ang mga awtoridad sa lugar nga ginatineran ni Dela Rosa agud arestuhon ini bangud mahimo ini magresulta sa madamo nga casualties.
“He’s in Mindanao. He’s under the protection of a group we are currently initiating conversations with for his turnover to the authorities,” suno sa DILG chief.
Ginpahayag sang opisyal nga mas pilion niya ang makig-negosyar anay sa baylo nga ibutang sa peligro ang kabuhi sang mga Pilipino.
Wala niya ginpaathag kun diin naghalin ang iya estimate nga mahimo maglab-ot sa 10,000 ang mga posible nga mapatay kun matabo ang madugo nga kumprontasyon.
“In exchange for up to 10,000 potential deaths, I would rather negotiate first than cost the lives of Filipinos in this,” suno kay Remulla. “You don’t always solve problems with a hammer. Sometimes you solve things better in a more peaceful, humane way.”
Sang Septyembre, nagpaandam man si Remulla nga mahimo magresulta sa madugo nga insidente ang pagtinguha nga arestuhon ang senador.
