ILOILO CITY – Ginkasubo sang non-profit institution nga Ibon Foundation ang ginpahayag sang Department of Trade and Industry nga bastante ang P500 para sa Noche Buena.
Sa interview sang Bombo Radyo kay Mr. Sonny Africa, executive director sang IBON Foundation, iya ginpahayag nga indi insakto nga ginapilit sang Department of Trade and Industry nga makaigo ang P500 para sa isa ka pamilya nga may apat tubtub lima ka myembro sa paskwa.
Ginpahayag sang ahensya nga sa P500 makabakal na sang spaghetti bundle nga P112, salad bundle nga P116.50, Pinoy pandesal nga P23.50, cheese nga P41.75, ground pork nga P31.25 kag hamon nga P163 ukon kabug-usan tanan nga P488.
Suno kay Africa, indi indi matuod bangud nagalain-lain ang presyo sang mga balaklon ilabi na sa mga probinsya.
Nagkadlaw na lang si Africa sa suhestyon sang Department of Trade and Industry nga diskarte lang ang kinahanglan sang mga bumalakal, kaangay sang pagbakal sang bundled items.
Nagpanawagan man ini sa publiko nga sukton ang gobyerno agud mahatagan sang solusyon ang problema ilabi na nga nagdangat na sa 8% ang inflation rate sang Nobyembre.
