ILOILO CITY – Magahatag sang financial aid ang siyudad sang Iloilo sa Marawi City bangud sang kinagamo subong sa lugar sa tunga sang tropa sang gobyerno akg Maute group.
Ginpahayag sa Bombo Radyo Iloilo ni Mayor Jed Patrick Mabilog nga magapakigsapol ini buwas sa Iloilo City Council para sa nasambit nga lihok.
Plano sang city government nga maghatag sang P500,000 nga financial aid sa Marawi kag ini ang ipaagi sa Department of Social Welfare and Development (DSWD).
Suno kay Mabilog, kinahanglan karon sang Marawi ang bulig pinansyal para sa relief operation sa linibo nga mga residente nga naapektuhan sang giyera.
Ginpasalig sang alkalde nga ginapahanugutan sa idalom sang layi ang nasambit nga lihok kag nahimo na ini sang siyudad sang maglaslas ang bagyo Yolanda kun sa diin naghatag sang financial aid ang Iloilo City sa Roxas kag siyudad sang Passi.
Dugang pa sang alkalde, sang nag-igo ang bagyo Frank sa Iloilo, naghatag man sang financial aid ang Tacurong City.
Padal-an naman sang kopya sang resolusyon ang tanan nga mga local government units sa bug-os nga pungsod agud ma-engganyo man ang mga ini nga magbulig sa Marawi.
