Ginpasa na sang Kamara sa Senado ang P6.325-trillion national budget para sa 2025.
Suno kay House committee on appropriations chair kag Ako Bicol party-list Rep. Zaldy Co, nalakip sa budget ang key amendments para nga mas mapabaskog ang social safety nets kag siguruhon ang food security.
Lakip diri ang dugang nga P292.23 billion nga idedikar sa pag-assist sa vulnerable sectors lakip na ang low-income families, mga mangunguma kag mga soldado.
Lakip man sa dalagku nga amendments amo ang extra P39.8 billion para sa Assistance to Individuals in Crisis Situations (AICS) kag Ayuda sa Kapos ang Kita Program (AKAP) nga magahatag sang financial aid sa mga tawo nga may income nga P21,000 ukon mas manubo pa kada bulan.
Ini nga AKAP allocation sa 2025 ang tatlo ka pilo nga mas mataas sangsa P13 billion sang nagligad nga tuig.
Nagapabilin man nga prayoridad ang edukasyon nga may dugang nga P30.01 billion para sa scholarships sa idalom sang Commission on Higher Education – Tertiary Education Subsidy kag Tulong Dunong programs.
Sa pihak nga bahin, ang Department of Education ang makabaton sang dugang nga P7 billion para sa construction kag pagkay-o sang school facilities.
Ang Armed Forces of the Philippines naman ang hatagan sang dugang nga P8.44 billion sa budget sa masunod nga tuig bangud sa mas mabudlay nga security challenges.
Lakip diri ang saka sa daily subsistence allowance sang 67 percent ukon pasaka sa P250 kag may pondo man para sa critical infrastructure projects sa Pag-Asa Island.
Sa sector sang agrikultura, may yara sang P30 billion nga ginpain sa irrigation kag cold storage projects para mas mapaayo ang food security. Ang 2025 budget naman sang National Irrigation Administration ang mas mataas sang P44 billion ipaanggid sa 2024 allocation.
