Isa ka pirma na lang ang kinahanglan kag dalayon na nga mangin layi ang 2025 General Appropriations Bill (GAB) nga amo ang nagaunod sang P6.352 trillion national budget para sa masunod nga tuig.
Ini matapos nga gin-ratipikahan na sang Senado kag Kamara ang amo nga hagna kahapon, Disyembre 11.
Kasunod man ini sang ginpatigayon nga bicameral conference kun sa diin gin-aprubahan kag gin-adoptar sang committee ang report sa mga wala nagsalanto nga mga probisyon.
Pagkatapos nga naratipikahan, ipadala na ini sa Malacañang para nga mapirmahan na ni President Ferdinand Marcos, Jr.
Sa Senado, sanday Senate Minority Leader Koko Pimentel kag Senate Deputy Minority Leader Risa Hontiveros ang nagpaguwa sang negative votes kag nagpahayag nga magapasa sang ila nga paathag.
Ini nga proposed 2025 national budget ang mas mataas sang 9.5% ipaanggid sa P5.268 trillion subong nga tuig.
Sa idalom sini nga budget, gin-retain sang Senado ang budget nga ginpasa sang Kamara kun sa diin ginbuhinan ang budget sang Office of the Vice President. Halin sa proposed P2 billion, ginhimo ini nga P733 million.
Natabo ini sa tunga sang pagpamalibad ni Vice President Sara Duterte nga magsabat sa mga pamangkot sang mga mamalidha kaangot sa ginaalegar nga mga anomaliya sa budget sang iya opisina lakip na ang paggamit sang confidential funds.
Kahapon, una na nga nagpabutyag sang pagkadismaya ang kaalyado sang mga Duterte nga si Senator Bato dela Rosa bangud wala gid natigayon ang ila ginduso nga pagbalik sang budget sang bise presidente.
Sa ginratipikahan man nga hagna, ang final version sang 2025 national budget ang nagpain sang P26 billion para sa Ayuda para sa Kapos and Kita Program ukon AKAP nga amo ang cash aid program para sa minimum wage workers.
