Gin-anunsyo ni President Ferdinand “Bongbong” Marcos Jr. nga igabalik sa Philippine Health Insurance Corporation (PhilHealth) ang P60 billion nga excess funds nga nauna na nga gin-transmit sang state-run health insurer sa national treasury.
Pahayag ni Marcos, ini nga desisyon ang nagapasiguro nga may bastante nga resources ang PhilHealth agud nga pasangkaron ang coverage sini kag ang benepisyo nga mahatag sa mga myembro.
“So I’m happy to be able to announce, dahil sa ating mga ginagawa, siguro alam naman ninyong lahat ‘yung mga savings natin na bago na galing sa iba’t ibang departamento—, but mainly from Department of Public Works and Highways (DPWH)—, ‘yung P60 billion na ‘yan ibabalik na natin sa PhilHealth,” suno sa presidente kadungan sang iya pagbisita subong nga adlaw, Septyembre 20, sa Dr. Jose Fabella Memorial Hospital sa Sta. Cruz, Manila.
“‘Yung P60 billion na ginamit natin sa iba’t ibang proyekto, dahil nagka-savings tayo, maidadala na natin ulit sa PhilHealth,” pahayag sini.
Matandaan nga sang nagligad nga tuig, nagmandu ang Department of Finance (DOF) nga isaylo ang sobra nga pondo sang PhilHealth nga lab-ot sa P89.9 billion sa Treasury. Ini ang government subsidies nga wala naggamit kag wala man naghalin sa member contributions.
Sa amo nga balor, P60-billion na ang nasaylo sa Treasury kun sa diin P29.9 billion ang nabilin sa PhilHealth antes nagpaguwa ang Supreme Court sang temporary restraining order sa fund transfer. Ang pagpatunga sang Korte Suprema ang kaangot naman sa petition ni Senator Koko Pimentel, Philippine Medical Association, kag iban pa.
Kun balikan, sang nagligad nga Abril, ginsiling ni Finance Secretary Ralph Recto sa Supreme Court nga ang na-transfer nga P60 billion ang ginpain para sa masunod:
P27.45 billion agud bayaran ang allowances sang COVID-19 frontliners
P10 billion sa Social Programs for Health agud nga makahatag sang medical assistance sa pigado nga mga Pilipino
P3.37 billion para sa pag-establisar sang tatlo ka DOH facilities
P4.1 billion agud nga mapabakod pa ang existing DOH facilities
P1.6 billion sa Health Facilities Enhancement Program
P13.00 billion agud nga pondohan ang government counterpart financing para sa foreign-assisted infrastructure kag social determinants para sa health projects
Sa iya anunsyo subong nga adlaw, ginpaathag naman sang presidente nga ang tikang nga ini ang nagasanto sa prayoridad sang iya administrasyon nga mapabakod pa ang healthcare system sang pungsod.
“Healthcare is the most important service the government can give. That is why pinapatibay natin nang husto, pinapalawak natin nang husto,” kabahin pa sang pahayag sang punong ehekutibo.#
