ILOILO – Diskusyunan pa sa Byernes, Mayo 17, sang Iloilo Provincial Government ang paggamit sang P61 million nga quick response fund sang probinsya.
Ini matapos nga ginpaidalom na sa State of Calamity ang bilog nga probinsya sang Iloilo bangud sa El Niño Phenomenon.
Sa interview sang Bombo Radyo kay Retired Col. Cornelio Salinas, pinuno sang Provincial Disaster Risk Reduction and Management Office, iya ginpahayag nga magapatigayon pa sila sang pagsinapol kaupod ang Committee on Disaster Risk Reduction and Management sa Sangguniang Panlalawigan sa pagpanguna ni Iloilo 4th District Board Member Rolando Distura.
Suno kay Salinas, ginpangayuan sang rehabilitation plan ang mga nagabug-os sa Provincial Task Force El Niño sa diin may ginplastar sila nga budget.
Apang wala ginpaboran sang Sangguniang Panlalawigan ang mitigating measures nga ginplastar, sa baylo may mga immediate assistance sila nga luyag ipatuman.
Lakip na diri ang paghatag sang tubig, cash assistance kag food assistance.
Nahibaluan nga 15 na ka mga local government units ang una na nga nagdeklarar sang state of calamity sa Iloilo.
Nagdangat naman sa masobra P1 billion ang kahalitan nga gintuga sang El Niño sa diin apektado diri ang humayan, maisan, high-value crops, mga punungan, livestock kag poultry sectors.
