Gin-aprubahan na sang Kamara sa ikatatlo kag katapusan nga pagbasa ang hagna sa ginaduso nga P7.2-trillion nga national budget para sa 2027.
Natabo ang pagpasar sang bill 62 ka adlaw matapos mabaton ang spending plan sang ehekutibo halin sa Department of Budget and Management (DBM).
Naglab-ot sa 281 ka mamalidha ang nagboto pabor, 13 ang nagkontra, kag isa ang nag-abstain sa House Bill Number 10858.
Talalupangdon ang mga kritisismo sa pagbag-o nga ginhimo sang lower chamber sa proposed budget lakip ang P116.32-billion nga realignment ukon pagbalhin sang pondo.
Suno sa mga kritiko, mahimo ini magpasangkad sang political patronage ukon paggamit sang pondo para sa politikal nga interes. Suno naman sa isa ka independent budget monitoring group, naglab-ot sa P198.9 billion ang kabug-usan nga mga pagbag-o sa budget.
Sa statement naman ni House Speaker Faustino “Bojie” Dy III, iya ginpahayag nga dapat mangin giya sa paghimo sang national budget ang pagsiguro nga magamit sang husto ang buwis sang pumuluyo para sa mga programa nga may direkta nga benepisyo sa publiko.
“When the National Expenditure Program was turned over to the House last August, we made a commitment to the Filipino people that every centavo earned through their hard work and paid in taxes must be spent wisely, honestly, and on programs that will make a real difference in their lives,” suno sa House leader.
“This served as our guide at every step in crafting the 2027 national budget.”
Lakip sa mga pagbag-o ang dugang nga P8.12 billion para sa edukasyon kag P20.86 billion para sa agrikultura.
Suno kay House Appropriations Committee Chairperson Mikaela Suansing, ginsiguro nila nga magapabilin nga nagapanguna nga prayoridad sang gobyerno ang paggasto para sa edukasyon.
Nagdugang man ang Kamara sang P11.49 billion para sa mga proyekto sa imprastraktura sang Department of Public Works and Highways (DPWH), samtang P2.35 billion naman ang gindugang para sa public transit service contracting kag EDSA Busway Project sang Department of Transportation (DOTr).
Nadugangan man sang P25 billion ang crisis assistance program sang Department of Social Welfare and Development (DSWD) kag P24.96 billion para sa programa sang Department of Health (DOH) nga nagabulig sa mga imol nga pasyente.
Nagpain man ang mga mamalidha sang P500 million para sa school safety program kasunod sang mga insidente sang kasingki sa mga eskwelahan sa nagligad nga mga bulan.
Sunod nga usisaon sang Senado ang proposed budget.
Pagkatapos sini, ginapaabot nga magtipon ang mga tiglawas sang duha ka chamber agud ma-reconcile ang ila tagsa ka bersyon antes ini ipadala kay Presidente Ferdinand Marcos Jr. para sa iya pirma.#
