Pasado na sa Iloilo City Council ang supplemental budget no. 5 nga magahatag sang P7,000 nga gratuity pay para sa tanan Contract of Service kag Job Order sang city government.
Sa interview sang Bombo Radyo kay Iloilo City Councilor Rex Sarabia, Chairman sang Committee on Appropriations, iya ginpahayag nga ang mandato ang kasunod man sang Administrative Order 28 nga gin-issue ni President Ferdinand Marcos Jr.
Suno kay Sarabia, ang gratuity pay ang ihatag para sa fiscal year 2024 sa mga Contract of Service kag Job Order nga empleyado nga nakahatag sang total ukon kabug-usan nga apat ka bulan nga serbisyo tubtob Disyembre 15.
Ginpahayag man sini nga ang mga trabahador nga nagserbisyo sang mas manubo sa apat ka bulan mahimo man nga makabaton sang gratuity pay nga base sa pro-rata.
Samtang, ang mga Contract of Service kag Job Order nga nagserbisyo sang tatlo ka bulan pero wala naglab-ot sa apat ka bulan, mahimo makabaton sang gratuity pay nga indi maglapaw sa P6,000.
Ang mga nagserbisyo naman sang duha ka bulan apang wala naglab-ot sa tatlo ka bulan, mahimo makabaton sang gratuity pay nga indi maglapaw sa P5,000.
Makabaton man ang mga trabahador nga nagserbisyo sang manubo sa duha ka bulan sang gratuity pay nga indi maglapaw sa P4,000.
