ILOILO CITY – Hugot nga ginapamatukan sang mga negosyante sa Iloilo City ang panawagan sang labor group nga pasakaan ang sweldo sang mga mamumugon.
Nahibaluan nga ginaduso sang FISHTA Union of Employees for Reforms through Solidarity Actions (FUERSA-SUPER) sa Regional Tripartite Wage and Productivity Board (RTWPB) nga pasakaan sa P750.00 ang minimum wage nga P395.00.
Sa exclusive interview sang Bombo Radyo kay Engr. Terrence Uygongco, chairman sang Iloilo Economic Development Foundation Incorporated, iya ginpahayag nga tuman kadako ang minimum wage nga ginapangayo sang FUERSA-SUPER kun ipaanggid sa sweldo subong sang mga mamumugon.
Suno kay Uygongco, 3% lang ukon P11.85 nga increase sa minimum wage ang ila mahatag.
Ang ini nga counter offer ang ginbase sa projected nga inflation sang National Economic and Development Authority (NEDA) sa Western Visayas nga nagadangat sa 3%.
Magluwas diri, ang isa man sa mga rason sang ILED sa pagpamatok sa P750 nga wage increase amo nga amat-amat pa lang nga nagabangon ang ekonomiya sa syudad.
Ginapahayag sang natungdan nga may mga negosyo pa lang nga bag-o bukas, apang indi pa makabalik sa pre-pandemic ang ekonomiya.
Sa tion nga iduso ang pagpasaka sang minimum wage, posible nga magpangbuhin ang mga negosyante sang ila empleyado.
