ILOILO CITY – Tion na agud bayaran sang Panay Electric Company ang Real Property Tax nga nagalab-ot sa P90 million.
Ini ang kasunod sang pagkumpirma ni Iloilo City Mayor Jerry Treñas nga ilakip sa auction sa Disyembre 12 ang pila sa mga propidad sang Panay Electric Company.
Sa interview sang Bombo Radyo kay Treñas, iya ginpahayag nga isa ang nasambit nga kompaniya sa ginakabig nga delinquent tax payer sa syudad sang Iloilo.
Suno kay Treñas, masobra na sa duha ka tuig nga naga-operate ang nasambit nga kompaniya nga wala sang business permit matapos nga napaslawan sa pagbayad sang buhis.
Gin-athag ni Treñas nga indi lamang ang propidad sang Panay Electric Company ang igalakip sa palaabuton nga auction.
Nauna na nga ginpahayag sang alkalde nga public property ang propidad sang nasambit nga kompaniya bangud nga ginabayaran man ini sang mga konsumidor.
Ginkumpirma ni Business Permit and Licensing Office Head Mr. Norman Tabud nga wala nakabayad sang real property tax ang Panay Electric Company.
Sa interview sang Bombo Radyo kay Tabud, iya ginpahayag nga ang ginbayaran lang sang Panay Electric Company amo ang business tax kag regulatory fees and charges kada tuig.
Suno kay Tabud, kapin sa duha ka tuig nga pending ang real property tax sang nasambit nga kompaniya rason nga mahimo pa nga magsobra sa P90 million ang dapat nga bayaran.
Sa pihak sini, ginpahayag ni Tabud nga indi na sakop sang Business Permit and Licensing Office ang patigayunon nga auction.
Ginpahayag ni Tabud nga ang City Treasurer’s Office kag ang City Assesor’s Office na ang may gahum tuhoy sa pagpa-auction sa ginakabig nga public properties.
