Ginpatigayon subong nga aga, Hunyo 24, ang isa ka Requiem Mass para sa promising student-athlete nga si Rene Clert “Bobet” N. Baterbonia sa Talacogon Municipal Gym sa Agusan del Sur.
Sa misa, makit-an nga tuman ang pagtalangison sang iya nga iloy kag mga utod kasunod sang temprano sini nga pagpaalam matapos nga nalumos sa “team building activity” sang Ateneo De Manila University men’s basketball team sa Aurora sadtong Hunyo 8.
Makit-an man ang mga medalya kag tropeo nga natipon ni Rene sa iya malip-ot lang apang matahum nga mga tinuig sa paghampang sang basketball.
Suksok naman sang iya mga taga-suporta ang puti nga jersey nga may naka-imprinta nga DAVRAA nga amo ang rehiyon nga gintiglawas ni Rene kag ginpangunahan agud magkampyon sa Palarong Pambansa 2025.
Sunod nga igadul-ong si Rene sa katapusan sini nga palahuwayan sa Talacogon Memorial Park sa Barangay Labnig sa amo man nga banwa kun sa diin siya nagdaku.
Ang bangkay ni Rene amo ang labing-una nga igalubong sa amo nga patyo. Ini nga lugar ang nagserbe anay bilang archery venue sang ginpatigayon ang Palarong Pambansa sa Agusan del Sur sang nagligad nga bulan.
Matandaan nga kaupod ni Rene nga nagtaliwan ang isa ka Nigerian player kag Ateneo import nga si Divine Adili.
Nangin kontrobersyal ang amo nga insidente kun sa diin naglunsar sang masangkad nga imbestigasyon ang nagkalain-lain nga ahensya sang gobyerno, ginpanawagan sang publiko ang salabton sang mga involved, kag nagresulta man sa pag-resign ni Coach Tab Baldwin sa men’s basketball team sang unibersidad.
Sa lubong subong nga adlaw, mangin representative sang Ateneo ang Vice President for Basic Education nga si Fr Joaquin Jose Mari Sumpaico III SJ.
Maga-upod man ang pila ka opisyal sang Ateneo de Manila kag Ateneo de Davao Senior High School kun sa diin nag-eskwela si Baterbonia antes ini nagpadulong sa Manila agud nga lab-uton kuntani ang iya handum nga makahampang sa UAAP sa idalom sang Blue Eagles.
