Ginakabig nga mabudlay nga proseso ang pag-atubang sa isyu sa pagpangluib sa isa ka relasyon.
Ini ang kaangot man sa natabo nga pagbulagay sang actress nga si Andi Eigenmann kag sa bana sini nga si Philmar Alipayo bangud sa Swedish nga babaye nga ginatudlo third party sa ila relasyon.
Sa interview sang Bombo Radyo kay Mr. Francis Ray Subong, registered guidance counselor, iya ginpahayag nga wala sang insakto nga formula kun paano ini atubangon, apang may mga pamaagi nga mahimo himuon agud mag-ayo kag makadesisyon kun ano ang masunod nga tikang.
Suno kay Subong, tuman nga maapektuhan sa tion nga may yara sang nasambit nga isyu amo ang psychological, social kag emotional nga aspeto sang isa ka indibidwal.
Panugyan sini, agud maka-move on, nagakadapat nga pabay-an ang kaugalingon nga makabatyag sang emosyon kag batunon nga ini ang normal.
Makabulig man ang suporta sang pamilya, mga abyan ukon isa ka therapist agud mabuligan nga magproseso sang emosyon kag makadesisyon sang insakto.
Sa tion nga handa na, makig-istorya sa inyo partner agud mahibalunan ang rason sang pagpangluib.
Ginpahayag sang natungdan nga ang maayo nga komunikasyon ang makabulig agud makuha ang sabat nga kinahanglan agud makadesisyon.
