ILOILO CITY – Nagpahayag sang pagsuporta kay Leo Rey Yanson bilang Presidente sang Vallacar Transit Inc. ang Philippine Agricultural, Commercial and Industrial Workers Union -Trade Union Congress of the Philippines (PACIWU-TUCP).
Ini ang may kaangtanan sa pag-ilis kay Leo Rey Yanson bilang Presidente kag Chief Executive Officer (CEO) sang Vallacar Transit Inc.
Sa interview sang Bombo Radyo kay Hernani Braza, presidente sang Philippine Agricultural, Commercial and Industrial Workers Union -Trade Union Congress of the Philippines, iya ginpahayag nga nagapati siya nga si Leo Rey Yanson sa gihapon ang legal president sang nasambit nga transport company kag indi ang utod nga si Roy Yanson.
Suno kay Braza, madugay na nga magpartner ang Vallacar Transit Inc. kag ang PACIWU-TUCP kag wala man sang problema sa pagpamuno sang manghod nga Yanson.
Kun may yara man sang reklamo ang mga empleyado, ginpahayag ni Braza nga ini ang gilayon nga ginasolbar sang ila grupo.
Magluwas diri, ginahatagan man sang mga benipisyo ang mga empleyado.
Sa pagkamatuod suno kay Braza, ang pag-ilis kay Leo Rey Yanson bilang presidente kag CEO sang nasambit nga transport company ang makabig nga illegal bangud nga wala sang pormal nga turn-over ceremony.
Samtang, gin-engganyo naman ni Braza ang mga empleyado nga indi magpangduha-duha nga magpalab-ot sang reklamo sa PACIWU-TUCP.
Suno kay Braza, indi man niya maluyag nga maapektuhan ang mga empleyado lakip na ang mga pasahero sa tion nga may yara sang problema sa pagdumala sa Vallacar Transit Inc.
Sa subong, ginpahayag sang natungdan nga ila hulaton ang desisyon sang korte kun sin-o ang legal president sang kompaniya apang sa subong, nagapati sila nga si Leo Rey Yanson sa gihapon ang Presidente kag CEO.
