Pacquiao gawaron ang nakaprenda nga duta sang pamilya Demafelis, balay ipatapos sang gov't

ILOILO CITY – Ginpasiguro sang gobyerno ang bulig sa pamilya ni Joanna Daniela Demafelis, ang Ilongga OFW nga ginpatay sang iya amo sa Kuwait.
Sa hearing sang Senado angot sa sitwasyon sang mga overseas Filipino workers sa Middle East, ginpahayag ni Labor Secretary Silvestre Bello III nga nagalab-ot na sa P600,000 ang cash assistance nga nabaton sang pamilya Demafelis gikan sa gobyerno.
Suno sa tiglikom, sabton na sang gobyerno ang pagpatapos sa ginapaubra nga balay ni Joanna para sa iya pamilya.
Una na ginpahayag sa Bombo Radyo sang iloy ni Joanna nga si Mrs. Eva Demafelis nga wala matapos ang ginapatindog nga balay ni Joanna bangud sang natabo sa iya.
Ginpromisa naman ni Sen. Manny Pacquiao nga gawaron ang duta sang pamilya Demafelis nga nakaprenda subong kag isa man sa mga rason sang pagpadulong ni Joanna sa iban nga pungsod.
Samtang duha pa ka mga opisyal sang embahada sa Kuwait ang gin-recall may kaangtanan sa kamatayon ni Joanna.
Ini amo sanday Labor Attache to Kuwait Atty. Alex Padaen kag ang assistant sini nga si Lily Pearl Guerero.