Ginbali ni eight-division world champion Manny Pacquiao ang pahayag sang American boxer nga si Floyd Mayweather Jr. nga isa lang ka exhibition fight ang ila liwat nga pag-atubangay sa Septyembre 19.
Suno kay Pacquiao, isa ka matuod-tuod nga away ang nakabutang sa kasugtanan nga iya ginpirmahan kaupod kay Mayweather. Pahayag pa sang Pinoy boxer, indi siya maghampang kun para lang ini sa exhibition.
Dapat dumdumon ni Mayweather suno sa iya kun ano ang iya ginpirmahan.
“From the beginning, my intention has been to give the fans what they truly want to see. A high-level, competitive sanctioned fight,” suno sa “The People’s Champ”.
“I want to be very clear that the contract we signed is for a professional boxing match. This is not an exhibition; it is a real fight,” dugang ni Pacquiao.
Madumduman nga sang nagligad nga bulan sang gin-anunsyo sang duha ka boksidor ang ila rematch kasunod sang landmark 2015 match.
Sa initial announcement, patigayunon ang sambuwa sa Sphere sa Las Vegas, Nevada, USA.
Sa interview naman kay Mayweather, gintawag niya ini nga exhibition nga buot silingon, kun ano man ang mangin resulta, wala ini sang epekto sa ila nga professional records.
Ginsiling man anay ni Mayweather nga wala pa nahitso kun diin gid ang venue.
Nahibaluan nga yara subong si Pacquiao sa Los Angeles, California agud nga lantawon ang pro match sang iya bata nga si Jimuel sa undecard sang IBF minimumweight world title fight.#
